 |
| Higinio Mallebrera |
a schiocche a schiocche li ccerase rosse...
Fresca era ll’aria e tutto lu ciardino
addurava de rose a ciente passe.
Era de maggio — io, no, nun me scordo —
na canzona cantàvamo a ddoje voce:
cchiù tiempo passa e cchiù me n’allicordo,
fresca era ll’aria e la canzona doce.
E diceva. «Core, core!
core mio, luntano vaje;
tu me lasse e io conto ll’ore,
chi sa quanno turnarraje!»
Rispunnev’io: «Turnarraggio
quanno tornano li rrose,
si stu sciore torna a maggio
pure a maggio io stonco cca».
E so’ turnato, e mo, comm’a na vota,
cantammo nzieme lu mutivo antico;
passa lu tiempo e lu munno s’avota,
ma ammore vero, no, nun vota vico.
De te, bellezza mia, m’annamuraje,
si t’allicuorde, nnanze a la funtana:
l’acqua Ilà dinto nun se secca maje.
e ferita d’ammore nun se sana.
Nun se sana; ca sanata
si se fosse, gioia mia,
mmiezo a st’aria mbarzamata
a guardare io nun starria!
E te dico — Core, core!
core mio, turnato io so’:
torna maggio e torna ammore,
fa de me chello che buo’!
1885
1 commento:
'O P U E T A
omaggio a Salvatore Di Giacomo
Ve dico, amice care, pe ‘nu poco
‘e chi ‘int’e vene ‘nce teneva ‘o fuoco,
‘e chi, parlanno ‘e Napule, senteva... Visualizza altro
‘a musica d’o mare ‘e suspirà.
Quant’anne so’ passate e, ce penzate,
mo quante e quante cose so’ cagnate,
ma nuie cercammo ancora ‘e ‘stu Pueta
quacche canzona ca po’ fa sunnà.
E si ‘ncuntrate ‘a luna a Marechiare
- a stessa luna ca p’e notte chiare
spuntanno ne sentette serenate –
‘e chillo, certo, v’arricurdarrà:
cu Napule teneva appuntamento
‘stu Pueta e a sera tutt’argiento
facette ‘sti culure ‘e chistu mare,
d’'e vicule e d’e strade e‘’sta città,
cuntaie ‘sti Cunte chine ‘e nustalgia,
facette ‘e ‘stu paese ‘na poesia,
e ‘sti canzone soie vanno ‘p’o munno
facenno ‘e nammurate suspirà.
Antonio Pisanti
da “Cento e passa poeti dialettali”
a cura di Teodoro Giùttari e Luigi Grande, Todariana Editrice
Posta un commento